Azad, Bütöv, Güclü Azərbaycan naminə !
Azad, Bütöv, Güclü Azərbaycan naminə !
Azad, Bütöv, Güclü Azərbaycan naminə !Əziz oxucu!
Yenicə təsis olunmuş “Qafqazın günəşi”adlanan dərgimizdə; “Azərbaycançılıq ideologoyası “ və bu ideologiyaya fədakarlıqla xidmət göstərmiş maarifçi ziyalılarımızı ,vətənsevər aydınlarımızı , Azərbaycanın dünəni , bu günü ,gələcəyi barəsində mühüm əhəmiyyət daşıyan hadisələri ,unudulmaması gərəkən və dünyanın bilməli, duymalı olduğu önəmli məsələləri işıqlandırmağa çalışacağıq
Məqsədimiz bu günkü gənclərimizin və yeniyetmələrimizin məlumatlı olması ,milli şüur və milli qürura malik olan vətənpərvər ,milli əqidəyə sadiq bir nəslin yetişərək dünyanın hər bir yerində aktiv şəkildə Azərbaycanın maraqları və mənafeyi naminə çalışması,yeni yetişən nəsil içərisindən Azərbaycana başucalığı gətirən şəxsiyyətlərin formalaşdırılmasıdır. Bu gün müasir Azərbaycanlı gənclər- yeniyetmələr elmin və texnologiyanın nailiyyətlərini izləməli ,müxtəlif sahələrdə bilik və bacarıqlara yiyələnməli, dünya miqyasında çoxişlənən xarici dillərdən hər hansı birində ( bacaraarsa bir neçəsində ) danışmağı və yazmağı bacarmalıdırlar. (Allaha şükür ki gənclərimizin xeyli hissəsi bu istiqamətdə inkişaf edib və xarici dillərə müasir texnolgiyalara yiyələniblər). Bunu bizdən Ana vətənimiz- Azərbaycan ,uğrunda həm qələmilə vuruşmuş fədakar şəxsiyyətlərin ruhu, həm də vətən uğrunda canını fəda etmiş şəhidlərimizin ,mübarizlərimizin ruhu tələb edir .
Üç min ildən çox yaşı olan yazılı abidəsi -“Kitabi Dədə-Qorqud dastan”ı kimi yazılı ədəbiyyatı olan bir xalqın, Oğuz xaqan, Bilgə xaqan ,Uzun Həsən ,Sah İsmayıl, Nadir Sah Əfşar,Qacarlar və bir çoxları kimi imperiyalar qurmuş ,xanədanlıqlar yaratmış babalarının olduğunu yaddan çıxarmayın. Bilməlisiniz ki , həmin əzəmətli hökmdarlar başqa dövlətlərlə danışıqlarınIı ,diplomatik yazışmalarını bizim bu gün danışdığımız doğma dilimizdə yürüdüblər.Bunu cəsarətlə deyə bilərik ki, erməni tarixçiləri kimi saxta tarix yaratmağa bizim eytiyacımız yoxdur, çünki Vatikan kitabxanalarında, Almaniyada (Drezden kitabxanası) və Britaniya muzeylərindəki Azərbaycanın tarix və mədəniyyətinə aid olan eksponatlar və əlyazmalar bizim dildə olduğuna görə necə deyərlər :- “ bar-bar bağırırlar”.
Gənclərimizin üzərinə düşən digər çox vacib məsələ: Dünya KİV-də Azərbaycanın haqq sözünü başqa xalqlara çatdıra bilən ,harada olursa olsun Azəbaycanın mənafeyini müdafiə edən,saxta erməni tarixi üzərində qurulmuş erməni yalanlarını ifşa edən yeni nəsil- bilikli və milli şüura malik azərbaycanlı təbliğatçıların, təmsilçilərin olmasıdır.Yeni texnologiyaları mənimsəmiş və xarici dil bacarıqlarına yiyələnmiş gənclərimiz Azərbaycanın maraqları uğrunda xüsusi əhəmiyyət kəsb edən məsələləri dünya KİV-də işıqlandırmalı, haqq sözümüzü müxtəlif dillərdə yazaraq və deyərək hər yerdə yaymalıdırlar. Prezident olduğu dövrdə “Gənclər günü” münasibətilə keçirilən ümumrespublika tədbirlərində ümumilli lider Heydər Əliyev dönə -dönə azərbaycanlı gənclərə tapşırırdı: “Dünyanın hansı ölkəsində olsanız da heç zaman unutmayın ki , siz azərbaycanlısınız və Azərbaycanın mənafeyinə xidmət etmək sizin əsas vəzifənizdir” .Hansı sənət və peşəyə malik olmağınızdan asılı olmayaraq istər diplomat olsun ya aşpaz, istər hüquqşünas olsun və ya xalçaçı, heykəltəraş və bədii oyma ustası, dərzi və ya memar , musiqiçi yaxud mühəndis – işinizi hər zaman mükəmməl şəkildə icra edərək azərbaycanlı olduğnuzu ,gözəl və orijinal olan işlərin, əsərlərin mədəniyyət nümunələrinin azərbaycanlılara məxsusluğunu göstərin .
Etiraf edək ki 20- 25 il bundan əvvəl dünya informasiya məkanında xain qonşularımızdan geri qalırdıq . Azərbaycanlılara məxsus milli- mədəni irsimiz, sənət nümunələrimiz oğurlanırdı və hələ də buna tez-tez cəhdlər olunmaqdadır. Zaman -zaman milli musiqimizə, milli mətbəximizə, xalçalarımıza , məbədlərimizə , torpaqlarımıza, milli geyimlərimizə , şair və alimlərimizə bir sözlə milli nəyimiz varsa sahib çıxmaq özününküləşdirmək istəyiblər, dilimizi, tariximizi unutdurmağa cəhd ediblər.Bizi bir- birimizə qırdırıb babalarımızın qurduğu imperiyaları bölüb, parçalayıb əlimizdən qoparıblar.
Milli bünövrənin əsasını təşkil edən Vətən,dil,əqidə birliyi hər bir milləti var edən əsas amilldir.Təsəvvür edin ki əgər “Oğuznamə” və ya “Kitabi Dədə Qorqudun dili öz dilimizdə olmasaydı (hərçənd ki Vatikan və Drezden kitabxanalarında saxlanılıb) yaxud imperiyalar yaratmış babalarımız diplomatik yazışmaları və danışıqları bu dildə aparmasaydılar( əlyazmalar faktiki olaraq dünyanın nüfuzlu kitabxanalarında saxlanılır) saxta erməni tarixçılərinin qarşısına hansı dəlillərlə çıxardıq? Bizdə ermənilər kimi elə bir vərdiş yoxdur ki, sonradan məskunlaşdıqları və ya işğal etdikləri torpaqlarda daşları cızıb- yazıb torpağa basdıraq ki, bizim “qədim” yazılarmızıdır. .Allaha şükür belə üsullara ehtiyac yoxdur və çox- çox minnətdarıq ki, 14 yaşında imperiya qurmuş (bunu Karl Marks da etiraf edib) şah babamız Şah İsmayıl-şair Xətai şeir və qəzəllərini, eləcə də divanını doğma dilimizdə yazıb, dilimizin gözəllik və üstünlüklərindən məharətlə yararlanıb .Allah ona qəni-qəni rəhmət eləsin! Bu günkü gündə də əsərlərinin dilini hər birimiz aydın başa düşürük və sevə- sevə öyrənirik .Hələ bu dildə yazmış Nəsimi kimi bir “Söz və təfəkkür nəhəngi”mizin olması da ayrıca qürurverici bir duyğudur. Gələcəkdə Azərbaycan dilində yazıb yaratmış yazarlarımız barədə ayrıca bir yazı təqdim edəcəyik.
Bir neçə il əvvəl Misirdə azərbaycanlı alimimizin aşkar etdiyi bir əlyazma barəsində məlumatı yeri gəlmişkən diqqətinizə çatdıraq .Sənan İbrahimli adlı azərbaycanlı tədqiqatçı Misirin Xədəviyyə kitabxanasından XV əsrdə yaşamış alim, şair, mütəfəkkir – Dövlətşah Səmərqəndinin (Dövlətşah Səmərqəndi Orta Asiya- Xarəzm türkü olmuşdur ) əlyazmalarını və üzərində Nizami yazılmış qalın cildli və qədim bir əlyazma tapmışdı .Üzərində Nizami yazılan əlyazmada həm Nizami Gəncəvinin həm də başqa şairlərin əsərləri var idi. Dövlətşah Səmərqəndinin əlyazmasında isə D.Səmərqəndi qeyd edib ki ;-“ mən Nizami Gəncəvinin iki min beytdən ibarət divanını və qəzəllərini öz gözlərimlə görmüşəm . Onlar türk dilinin Gəncə dialektində yazılmışdı”.Əlbəttə ki XII əsrdə yaşamış Nizami Gəncəvi XV əsrdə də məşhur olub D.Səmərqəndinin yazdıqlarından belə nəticə yə gəlmək olur ki,.onun dediyi kimi Nizami Gəncəvinin türk dilinin Gəncə dialektində olan əsərləri günümüzədək ya tapılmayıb ya da tapılıbsa qərəzlə məhv edilib.Bunları yazmaqda məqsədim odur ki gənc nəsil gözüaçıq olmalıdır və maddi mənəvi irsimizə sahib çıxmalı və onları mühafizə etməlidirlər .Əks halda sərvətlərimizi başqaları mənimsəyəcək.
Azərbaycan həm çar Rusiyasının həm də Sovet İttifaqının tərkibində olduğu vaxtlarda milli kimliyimizin – identifikasiyanın itirilməsi, başqa xalqlar içərisində əriməsi- assimilyasiyası üçün milli təfəkkürə sahib savadlı, dərrakəli ziyalılarımızı məhv edərək , savadsız kütləni işçi qüvvəsi kimi saxlamaqla dil,din və milli şüura aid olan hər nə varsa unutdurmağa çalışıblar.
Biz dərgimizdə müxtəlif dövrlərdə yaşayıb yaratmış və Azərbaycan naminə əhəmiyyətli fəaliyyətləri olmuş şəxsiyyətlər ( “DİFAİ” və “İttifaq” təşkilatları və onların fəaliyyəti, maarifçi yazıçı və şairlərimiz , “Molla Nəsrəddinçi” ədiblərimiz və sənətkarlarımız Sovet dövrü və müstəqil Azərbaycanın ədib və ziyalılarının fəaliyətləri haqqında yazılar dərc edəcəyik ,onların ən ağır mühitdə ən çətin şəraitdə belə xalqımız, dilimiz,vətənimiz uğrunda fədakar zəhmətinə birlikdə nəzər yetirəcəyik. Eləcə də dünyanın müxtəlif yerlərində yaşamaqda və çalışmaqda olan azərbaycanlılara da dərgimizdə yer ayıracağıq (Bu həm Kremlin memarı ya da Nobel mükafatı alan və ya Pentaqonda çalışan yaxud NASA-da işləyən və ya Fransanın milli qəhrəmanı ya da Sovet İttifaqı qəhrəmanı Azərbaycanın milli qəhrəmanları ola bilər və mümkün qədər məqalələrin başqa dillərə tərcümə olunaraq digər ölkələrdə çap olunmasına nail olmaq istərdik (bu işlər hamısı gənc və düşüncəli beyinlər ,zəhmət, vaxt, hövsələ tələb edir ). Həm də istərdik ki, dərgimizdə gənclər bu məsələlərlə bağlı məlumatlarını fikirlərini bölüşsünlər, daimi söhbət və müzakirələrdə iştirak etsinlər .
Əziz gənclər ! Dünyanın hər yerində yaşayan azərbaycanlılar: İrandakı Güney Azərbaycanlılar,İraqdakı Kərküklülər, Anadoluda, Gürcüstanda,Dağıstan ellərində yaşayan bütün azərbaycanlılar gözlərini Azərbaycan Respublikasına dikiblər , onlar Azərbaycanla nəfəs alır ,ürəkləri Azərbaycanla döyünür. Azərbaycan respublikasında yaşayan azərbaycanlılar müstəqil dövlətimizi qorumaq, gücləndirmək hər bir azərbaycanlının vətənimizdə azad və firavan yaşayışını təmin etmək düşüncəsilə yaşamalıdırlar. Axı Azərbaycan Şərqin ilk deokratik respublikasıdır və biz daima neçə-neçə ilklərə imza atmış bir xalqıq .Azərbaycan respublikası –dünya azərbaycanlılarının ortaq nöqtəsi,amal və mənafe birliyi, vəhdət məbədidir.
Beləliklə AZAD ,BÜTÖV,GÜCLÜ AZƏRBAYCAN naminə irəli!
Araşdırmaçı- yazar Rüşanə Babayeva
